E Kōkua i nā Kūpuna ʻElua ʻo “Pepeke ʻAike He” lāua ʻo “Pepeke ʻAike ʻO”

Aloha nui, e kuʻu makamaka ʻōlelo Hawaiʻi.

Eia kahi mea aʻu i manaʻo ai e hōʻike aku iā ʻoe, i hiki paha iā ʻoe ke kōkua i ke olakino nāwaliwali o ʻelua kupuna i waena o kākou, he mau kūpuna hoʻi e waiho wale ʻia nei ma ko lāua hikieʻe ma ke kūʻono o ko kākou hale! A ke kiʻi a kū a hele aʻe, he hele kāpekepeke kā! Aloha ʻino ia ʻanakē a me ia ʻanakala!

Eia ko lāua mau inoa: ʻo Pepeke ʻAike He a me Pepeke ʻAike ʻO!

I loko nō o ka hiki ke kālele i ka piko ma ka hoʻolele ʻana i mua (kapa au i kēia he "piko kaumua"), nui ʻino ka hana pēlā na ka poʻe ʻōlelo o kēia wā. E nānā aku ka maka i nā palapala a ka poʻe kākau! E hoʻolohe ka pepeiao i nā māpunaʻōlelo a ka poʻe ʻōlelo! I koʻu kuhi, ma muli paha ia o ke "kiʻina kāpili manaʻo" maʻamau ke ʻōlelo i ka ʻōlelo haole:

  • My car is a good car — (X) "ʻO koʻu kaʻa, he kaʻa maikaʻi"
  • My car is the good car. — (X) "ʻO koʻu kaʻa, ʻo ia ke kaʻa maikaʻi"

E aho loa ke hoʻopuka aʻe i ka Pepeke ʻAike He a me ka Pepeke ʻAike ʻO ma ke ʻano e Hawaiʻi ai ka ʻōlelo Hawaiʻi, penei:

  • My car is a good car. => He kaʻa maikaʻi koʻu kaʻa.
  • My car is the good car. => ʻO ke kaʻa maikaʻi koʻu kaʻa, a i ʻole
  • ʻO koʻu kaʻa ke kaʻa maikaʻi.

E like paha me kēia:

  • "ʻO kekahi ala hoʻoponopono, ʻo ia nō ka 'hana kope' ʻana i ka haʻawina lā."
  • ʻO kekahi ala hoʻoponopono ka 'hana kope' ʻana i ka haʻawina lā.
  • ʻO ka 'hana kope' ʻana i ka haʻawina lā kekahi ala hoʻoponopono.

E ʻoluʻolu, e kākoʻo pū mai i ia mau kūpuna ʻelua e ʻauana kāpekepeke nei i waena o kākou i kēia wā.

naʻu, me ke aloha mau i ka ʻōlelo Hawaiʻi
na kumu Kaliko
´¨)
¸.· ´¸.·*´¨) ¸.·*¨)
(¸.·´ (¸.·Kaliko