3401B He Moʻolelo Pōkole #2

Ka Haʻalele ʻAna Iā Hawaiʻi

This item is Chapter Two of the book "He Moʻolelo Pōkole" by James W. L. McGuire. It is titled "Ka Haʻalele ʻana iā Hawaiʻi", meaning in essence "The Departure From Hawaiʻi".

Texts

PDF Chapter Two: "Ka Haʻalele ʻana iā Hawaiʻi"

The vocabulary sheet and audio readings are in production at this time.

Ka Haʻalele ʻana iā Hawaiʻi

Ma ke kakahiaka Pōʻalua o ka lā 12 o ʻApelila, he manawa ia no ka pīʻōʻō o ka poʻe e hele ana ma muli o ke komo ʻana mai o nā hoaloha e ʻike a e hāʻawi i ko lākou aloha a me nā ʻōlelo hoʻohauʻoli; aia nō hoʻi nā kalapu hīmeni e mele ana i nā mele nani o Hawaiʻi; ka poʻe hea inoa nō hoʻi a me ka poʻe olioli e hāʻawi mai ana i nā kānaenae aloha e like me ka mea maʻamau ma nā huakaʻihele a ko Hawaiʻi nei poʻe aliʻi.

Ma ka hola 11:30, ua kau akula ka Mōʻīkāne a me ka Mōʻīwahine, ke Kamaliʻiwahine Liliʻuokalani, a me ke Kiaʻāina John O. Dominis, ma ke kaʻa aliʻi, a ʻo nā ukali nō hoʻi ma ko lākou kaʻa ma hope aku, a holo akula no kai o ka uapo, kahi a ka mokuahi Australia e kakali mai ana no kāna mau ʻōhua hanohano i aloha nui ʻia e ka lāhui Hawaiʻi, a i hōʻike mai hoʻi i ko lākou aloha ma ka hiki kino ʻana aʻe a piha pū ka uapo, ke hele lā a “Lei Kohala i ka nuku nā kānaka.”

Ma ka hola 12 ponoʻī, ua hemo maila nā kaula hoʻopaʻa o ka moku, me nā leo hulō o nā makaʻāinana e paʻapaʻina ana i ka lewa, nā ani hainakā goodbye aloha ana, ua emi hope maila ka Australia, e hoʻokū pono ana i kona ihu i ke ala e hiki aku ai i ka nuku o Māmala. I ka hoʻokuemi pono ʻana iho o ke kīkala o ua wahine ʻau moana lā, ua ʻoni mālie aʻela kona mau ʻenekini me ka lawe nihi mālie ʻana o kona huila, a niau akula no ka hale ipu kukui, ʻoiai hoʻi ka hae kalaunu o ka Mōʻīwahine o Hawaiʻi e welo haʻaheo ana i nā welelau makani ma ke kia hope o ka Australia.

ʻOiai ka Australia e niau mālie ana ma mua mai o nā moku manuā e kū ana i loko o ke awa laʻi o Kou, ua ʻaoa maila nā ʻīliohae a Uncle Sam, ma ka hāʻawi ʻana mai i nā pū aloha he 21 no nā kamahele aliʻi e ʻau ana i ka moana kai uli o ka Pākīpika. A i ka wā a ka Australia i kāʻalo aʻe ai ma mua o ka Hale Ipukukui, a huli pono akula ka ihu i Māmala, ua ʻuʻina nākolokolo maila ka leo o nā pūkuniahi a nā koa kūmau o ke alo aliʻi, ma ka batare o Kakaʻako (ma kahi e kū nei ʻo ka Fort Armstrong), e hāʻawi mai ana nō hoʻi i ke aloha goodbye o ka lāhui.

E ukali ana nō hoʻi ka moku kolo ʻo ʻEleu, me ka Mōʻī a me kekahi mau maka hanohano, ma luna ona. Pēlā nō hoʻi ka mokuahi ʻo John A. Cummins a me ka Royal Hawaiian Band ma luna ona e haʻaheo ana i nā mele kaulana o Hawaiʻi. I ka puka ʻana aku ma waho o ka nuku o Māmala, ua pā maila kahi aheahe makani mai ka ʻāina mai a hoʻopuehu aʻela i nā hunakai ma ke alahele o nā Aliʻi; a laila, hoʻomanaʻo aʻela au i kēia mau lālani mele o Hawaiʻi:

A waho lā o Māmala
Hao mai nei ehuehu
Puluʻelo i ka hunakai
Kīheʻaheʻa i ka ʻili

Ua ukali mai nō nā mokuahi ʻo ʻEleu a me Cummins a hiki i ke kāʻalo ʻana aʻe o ka Australia ma mua o Daimana Hila, a laila, huli hoʻi aku lāua me ka Mōʻī a me kona mau hoa, me ke mele ʻana mai a ka Bāna i ke mele i ʻanoʻi nui ʻia, ʻo “Aloha ʻOe.”

Pane mai

Send comments about this page to Kumu Kaliko.