Aloha kākou. I kēia manawa, aia kākou ma luna o Molokaʻi, he mokupuni i nani a mālie ke ʻano. ʻŌlelo ʻia, ʻo “Molokaʻi nui a Hina”, no ka mea, ua hānau ʻia ka mokupuni ma hope o ka moe pū ʻana o Hina me Wākea, ʻelua akua o ka wā kahiko loa.
He 37 mile ka loa, a he 10 ka laulā. Ma ka ʻaoʻao hikina o ka mokupuni, aia nā pali a me nā awāwa. Aia nā wailele a me nā nāhele he nui. Aia lā hoʻi ʻo Kamakou, he kuahiwi 5 kaukani kapuaʻi; he nui ka ua ma laila. Aia ka wailele ʻo Kahiwa, a ʻo ia kekahi o nā wailele lōʻihi loa ma ka honua nei: ma kahi o ka 1,800 kapuaʻi kona lele ʻana a i loko o ke kai. ʻO kekahi o nā pali o laila, he 3,300 kapuaʻi ke kiʻekiʻe ma luna o ke kai. ʻO ia hoʻi kekahi o nā pali kapakai kiʻekiʻe loa o ka honua!
He ʻokoʻa loa ka ʻaoʻao komohana, ʻaʻole i like pū me ka ʻaoʻao hikina. Aia ma laila kekahi kahua pipi nui loa a me nā holoholona like ʻole, a me ke kauhale ʻo Maunaloa. Aia ma kēlā ʻaoʻao kēia mau wahi: ʻo Maunaloa, Kaluakoʻi, Moʻomomi, Ka-lae-o-ka-ʻïlio, Kepuhi, Ka-lae-o-ka-lāʻau, a me ka Hale o Lono.
A ma waena o ka mokupuni, aia ʻo Kalaupapa. He wahi kaulana i ka poʻe lepela e noho ana i laila. Aia pū hoʻi ʻo Kaunakakai, he kauhale nui nō hoʻi, a he wahi kaulana i nā malihini.
Ua noho nā kānaka ma Molokaʻi ma kahi o hoʻokahi kaukani makahiki. Ua kaulana ʻo Molokaʻi i nā kāula i ka wā kahiko, a ʻo Lanikāula paha ka mea kaulana loa. Ua ola ʻo ia ma kahi o ʻelima haneli makahiki aku nei. Ua aʻoaʻo ʻo Lanikāula i nā aliʻi a me nā makaʻāinana o Molokaʻi, a me nā kānaka o nā mokupuni ʻē aʻe nō hoʻi kekahi.
A hiki i kēia mau lā, he mālie ka noho ʻana ma Molokaʻi, a ʻaʻole loa kākou e makemake e lilo ʻo Molokaʻi he wahi i piha i nā kānaka a me nā kaʻa a me nā hale like ʻole. Maikaʻi loa ʻo Molokaʻi me ia nō, he home aloha no nā kānaka i hānau a hānai ʻia ma laila, no ka poʻe Hawaiʻi, a no nā malihini he liʻiliʻi wale nō.
I kēia manawa, e pau ana ka moʻolelo no Molokaʻi, no ka mea, he nui nā huaʻōlelo hou e aʻo ai. E holomua kākou…
Please log in to activate the audio player.
Use the buttons below to go the previous item, the help index, or the next item.