Hawaiʻi Island Story

Aloha kākou. I kēia manawa, e huakaʻi ana kākou i ka Moku o Keawe, ʻo ia hoʻi ʻo ka mokupuni ʻo Hawaiʻi! ʻO ka mokupuni nui loa ia o nā mokupuni Hawaiʻi a pau. ʻO ka home ia o ka wahine ʻo Pele. ʻO Halemaʻumaʻu ka inoa o ka lua pele, ma Kīlauea. Ma luna aʻe o Kīlauea, aia ʻo Mauna Loa e noho mālie ana. He mauna loloa maoli nō ia ke nānā aku.

ʻO Mauna Kea paha ka mauna kaulana loa o Hawaiʻi. ʻO ka home ia o Poliʻahu, ke akua wahine o ka hau, a ʻo ia hoʻi ka mauna kiʻikiʻe loa o ka honua nei, mai lalo o ka moana a hiki i kona wēkiu. Ma kahi o ke kanakolu- kūmākahi kaukani kapuaʻi kona kiʻekiʻe! Ma luna hoʻi o Mauna Kea nā hale kilo hōkū o nā ʻāina like ʻole.

Aia nā kuahiwi o Kohala ma ka ʻākau o Mauna Kea. ʻO ia nā mauna kahiko loa o ka mokupuni. Ma laila i hānau a hānai ʻia ai ʻo Kamehameha, ke aliʻi kīlou moku o Hawaiʻi ma kahi o ka makahiki 18 haneli.

He nui ka hana mahiʻai ma Hawaiʻi. E ʻike ana paha kākou i nā pua nani, nā makeima, nā kope, nā mīkana, a me nā huaʻai like ʻole. E ʻike ana hoʻi i nā kahua pipi, e like me ka mea kaulana ʻo Pāka. Ma kahi o ka 250,000 ʻeka kona nui!

ʻO nā inoa o nā moku o Hawaiʻi, ʻo ia hoʻi ʻo Hilo, Puna, Kaʻū, Kona Hema me Kona ʻākau, Waimea, Kohala, a me Hāmākua. He ʻoi aku ka poʻe e noho ana ma ʻaneʻi i ka hoʻokahi haneli kaukani. Nui nā malihini e makemake ana e holoholo i nā Kona, no ka mea, he pā nui ka lā ma laila. Ma ka ʻaoʻao Koʻolau, ʻo ia hoʻi, ʻo Hāmākua, Hilo, a me Puna, he ʻano nui nō ka ua i kekahi manawa. No laila, he nui nā hōkele ma ka ʻaoʻao Kona.

ʻAʻole kākou e huikau i ka inoa ʻo Hilo. He ʻelua wahi i kapa ʻia ʻo Hilo: ʻo kekahi ka moku, mai kai a hiki i uka loa i waena o Mauna Kea me Mauna Loa. ʻO kekahi “Hilo”, ʻo ia ke kauhale ma kai, nona ke kahua mokulele, nā hale kūʻai, a me nā hale ʻāina maikaʻi!

ʻO ka ʻōhiʻa kekahi kumu lāʻau e ulu ana ma ka nahele o Hawaiʻi nei. He lāʻau ʻoʻoleʻa kona i kūpono no nā pou hale i ka wā kahiko. ʻO ka pua o ia kumu, he “lehua” kona inoa. He pua ʻulaʻula ia. ʻO ka pua lehua ka pua nani e kaulana nei ʻo Hawaiʻi. He uluwehiwehi maoli nō ka nahele i nā pua lehua!

[mepr-show if=”loggedin”] Disc 2, Musical Introduction
[mepr-s3-audio src=”oleloonline/audio/topics/disc-2-01.m4a”] Disc 2, Track 2
[mepr-s3-audio src=”oleloonline/audio/topics/disc-2-02.m4a”] [/mepr-show] [mepr-show if=”loggedout”]

Please log in to activate the audio player.

[/mepr-show]

Use the buttons below to go the previous item, the help index, or the next item.


Pane mai

Send comments, corrections, or questions about this page to Kumu Kaliko.